چھوٹی و درمیانی صنعتوں کیلئے طویل المدتی قرض کی شرح سالانہ 2 فیصد کرنے کا مطالبہ

فیڈریشن آف بلوچستان انڈسٹریل اینڈ ٹریڈرز ایسوسی ایشن (فباٹی) نے صوبے میں چھوٹی اور درمیانے درجے کی صنعتوں (SMEs) کی بقا اور بحالی کے لیے گورنر اسٹیٹ بینک آف پاکستان کو ایک خط ارسال کیا ہے، جس میں ایس ایم ای سیکٹر کے لیے طویل المدتی قرضوں کی شرح سالانہ 2 فیصد مقرر کرنے کا مطالبہ کیا گیا ہے۔

صدر فباٹی رضا حسین کا کہنا ہے کہ اس وقت چھوٹی صنعتوں کو کائیبور (KIBOR) پر زائد شرح کے تحت مہنگے قرضے مل رہے ہیں، جس کے باعث نئی مشینری کی خریداری اور پیداوری صلاحیت میں اضافہ ناممکن ہو چکا ہے۔ خط میں نشاندہی کی گئی ہے کہ بلند شرحِ سود، بجلی و گیس کے بھاری ٹیرف اور مسلسل بڑھتے ہوئے ٹیکسوں کے سبب چھوٹی صنعتیں شدید مالی دباؤ کا شکار ہیں، جس سے صنعتی بندش اور بے روزگاری میں مسلسل اضافہ ہو رہا ہے۔ رضا حسین نے تجاویز پیش کرتے ہوئے اسٹیٹ بینک سے مطالبہ کیا کہ وہ برآمد کنندگان کی طرز پر چھوٹی صنعتوں کے لیے فکسڈ ریٹ فنانسنگ اسکیم اور جامع پالیسی تیار کرے، جبکہ اس ضمن میں وفاقی وزیر خزانہ محمد اورنگزیب کو بھی ایک خط ارسال کیا گیا ہے