افغانستان میں اس وقت 25 دہشت گرد تنظیمیں کام کر رہی ہیں: محسن نقوی

وفاقی وزیر داخلہ محسن نقوی اور وزیر مملکت طلال چوہدری سے اقوام متحدہ کے سیکرٹری جنرل انتونیو گوتریس نے اہم ملاقات کی، جس میں عالمی و علاقائی سیکیورٹی صورتحال، انسدادِ دہشت گردی اور اقوام متحدہ کے امن مشنز سے متعلق امور پر تفصیلی تبادلہ خیال کیا گیا۔

ملاقات کے دوران گفتگو کرتے ہوئے وفاقی وزیر داخلہ محسن نقوی نے کہا کہ پاکستان دہشت گردی کے خلاف عالمی جنگ میں ہراول دستے کا کردار ادا کر رہا ہے۔ انہوں نے انکشاف کیا کہ اس وقت افغانستان میں 25 سے زائد دہشت گرد تنظیمیں متحرک ہیں جو نہ صرف خطے بلکہ عالمی امن کے لیے انتہائی سنگین خطرہ بن چکی ہیں، جس سے نمٹنے کے لیے بین الاقوامی برادری کو متحد ہو کر فوری اور جامع اقدامات کرنے ہوں گے۔ وزیر داخلہ نے مزید کہا کہ پاکستان اقوام متحدہ کے امن مشنز میں اپنا موثر کردار جاری رکھے گا، جہاں اب تک 181 پاکستانی جوانوں نے عالمی امن کی خاطر اپنی جانوں کا نذرانہ پیش کیا ہے۔ سیکرٹری جنرل انتونیو گوتریس نے امن مشنز میں پاکستان کی لازوال قربانیوں اور خدمات کی تعریف کرتے ہوئے دنیا میں امن و استحکام کے لیے اسلام آباد کے کردار کو سراہا