کے پی کا بُرا حال، پی ٹی آئی عمران خان کے بیانیہ میں مصروف ہے: علی شاہ باچا

ستان پیپلز پارٹی (پی پی پی) خیبر پختونخوا کے صدر محمد علی شاہ باچا نے پاکستان تحریک انصاف (پی ٹی آئی) کی صوبائی حکومت پر شدید تنقید کرتے ہوئے کہا ہے کہ صوبے میں دہشت گردی، بدامنی، کرپشن اور ناقص گورننس پر توجہ دینے کے بجائے تمام تر توانائیاں محض سیاسی سرگرمیوں اور عمران خان کے بیانیے پر ضائع کی جا رہی ہیں۔ پشاور میں نیوز کانفرنس کرتے ہوئے پی پی پی رہنما نے کہا کہ پی ٹی آئی کی قیادت مختلف اضلاع کے دورے کر کے سیاسی دباؤ تو بڑھا رہی ہے لیکن عوام اور بالخصوص نوجوانوں کا معاشی و امن و امان کے لحاظ سے شدید نقصان ہو رہا ہے۔

انہوں نے نشاندہی کی کہ جن اضلاع میں پی ٹی آئی کی قیادت پہنچ رہی ہے، وہاں مخالف سیاسی جماعتوں کو جلسے اور احتجاج کی اجازت تک نہیں دی جا رہی۔ صوبے میں روزگار ختم ہو رہا ہے اور سیکیورٹی فورسز و پولیس کے اہلکار روزانہ شہید ہو رہے ہیں، لیکن منتخب نمائندے کارکردگی دکھانے میں مکمل طور پر ناکام رہے ہیں۔ محمد علی شاہ باچا نے ان افواہوں کی بھی تردید کی کہ وفاق صوبے میں گورنر راج یا ایمرجنسی لگانا چاہتا ہے اور پی ٹی آئی پر زور دیا کہ وہ سیاسی ڈرامے بازی چھوڑ کر انسدادِ دہشت گردی اور عوامی فلاح پر توجہ مرکوز کرے۔