عالمی امن کے لیے مکالمے اور باہمی تعاون کو فروغ دینا ہوگا: یوسف رضا گیلانی

چیئرمین سینیٹ سید یوسف رضا گیلانی نے تنزانیہ کے شہر اروشا میں منعقدہ بین الپارلیمانی یونین (آئی پی یو) کی 153ویں اسمبلی سے خطاب کرتے ہوئے زور دیا ہے کہ عالمی امن، استحکام اور پیش رفت کے لیے تمام ممالک کو مکالمے اور باہمی تعاون کا راستہ اختیار کرنا ہوگا۔ چیئرمین سینیٹ نے کہا کہ پائیدار ترقی، معاشی استحکام اور انسانی بااختیاری کا براہِ راست تعلق دنیا میں قائم امن سے ہے، لہٰذا بین الاقوامی تعلقات کی بنیاد شمولیت، باہمی اعتماد اور مساوی مواقع پر ہونی چاہیے۔

سید یوسف رضا گیلانی نے عالمی سطح پر جامع طرزِ حکمرانی کی ضرورت پر روشنی ڈالتے ہوئے کہا کہ پاکستان ہمیشہ سے تمام بین الاقوامی تنازعات کے پرامن حل اور سفارت کاری کے ذریعے کشیدگی میں کمی کا حامی رہا ہے۔ انہوں نے عالمی برادری اور پارلیمانی نمائندوں پر زور دیا کہ چیلنجز سے نمٹنے کے لیے مل بیٹھ کر بات چیت کو فروغ دیا جائے۔ چیئرمین سینیٹ نے اپنے خطاب کے دوران مقبوضہ کشمیر کے عوام کی اخلاقی و سفارتی حمایت کا اعادہ کرتے ہوئے مطالبہ کیا کہ کشمیریوں کو اقوامِ متحدہ کی سلامتی کونسل کی قراردادوں کے مطابق ان کا بنیادی حقِ خودارادیت دیا جائے۔