اپوزیشن اور حکومت کے درمیان دوبارہ مذاکرات کی امید ہے: فواد چودھری

سابق وفاقی وزیر فواد چوہدری نے لاہور میں انسداد دہشت گردی عدالت کے باہر میڈیا سے گفتگو کرتے ہوئے انکشاف کیا ہے کہ آئندہ 24 گھنٹوں کے اندر اپوزیشن اور حکومت کے درمیان دوبارہ مذاکرات شروع ہونے کی قوی امید ہے۔ انہوں نے کہا کہ ملک میں اس وقت بڑے پیمانے پر سیاسی و خارجی فیصلوں کی پیش رفت ہو رہی ہے، جن میں ‘مکہ معاہدے’ پر عمل درآمد اور نئے صوبوں کے قیام سے متعلق تجاویز شامل ہیں، جن کے ملکی نظام اور عوام پر گہرے اثرات مرتب ہوں گے۔

فواد چوہدری کا کہنا تھا کہ ایسے اہم فیصلے نافذ کرنے کے لیے ملکی سیاست میں استحکام اور جمہوریت کا تسلسل انتہائی ضروری ہے، لہٰذا حکومت اور اپوزیشن کے درمیان بات چیت کا ہونا ایک خوش آئند اقدام ہے۔ پاکستان تحریک انصاف (پی ٹی آئی) کی اندرونی صورتحال اور مذاکراتی حکمتِ عملی پر بات کرتے ہوئے انہوں نے مشورہ دیا کہ پی ٹی آئی کی مذاکراتی کمیٹی کو چاہیے کہ وہ پہلے بانی پی ٹی آئی عمران خان کے لیے ریلیف حاصل کرنے پر توجہ دے، جس کے بعد دیگر ملاقاتوں اور امور کو آگے بڑھایا جائے۔