پاکستان اور آئی ایم ایف کے درمیان مذاکرات رواں ہفتے مکمل ہوجائیں گے

پاکستان اور عالمی مالیاتی فنڈ (آئی ایم ایف) کے درمیان جاری جائزہ مذاکرات کامیابی کی طرف گامزن ہیں اور روانہ ہفتے مکمل ہو جائیں گے۔ ذرائع وزارتِ خزانہ کے مطابق دونوں فریقین نے معاشی صورتحال اور اہم اہداف پر پیش رفت کا تفصیلی جائزہ لیا ہے، جس پر آئی ایم ایف نے پاکستان کے زرمبادلہ کے ذخائر کے استحکام پر اطمینان کا اظہار کیا ہے۔ فنڈ نے جولائی سے ستمبر کی پہلی سہ ماہی کے دوران فیڈرل بورڈ آف ریونیو (ایف بی آر) کی جانب سے ٹیکس اہداف کی وصولی کو خوش آئند قرار دیتے ہوئے پاکستان کی معاشی اصلاحاتی پالیسی کو سراہا ہے۔

مذاکرات میں اسٹیٹ بینک آف پاکستان نے وفد کو آگاہ کیا کہ افراطِ زر پر قابو پانے کی سخت پالیسیوں کے باعث اسٹیٹ بینک کے زرمبادلہ کے ذخائر 21.4 ارب ڈالر اور کمرشل بینکوں کے ذخائر 5.4 ارب ڈالر کی مستحکم سطح پر پہنچ چکے ہیں۔ مزید برآں، سال کے اختتام پر کسانوں کے لیے فکسڈ ٹیکس اسکیم متعارف کرانے کی تجویز بھی زیرِ بحث آئی۔ ذرائع کے مطابق آئی ایم ایف جلد پاکستانی حکام کے ساتھ ’میمورنڈم آف اکنامک اینڈ فنانشل پالیسیز‘ (MEFP) کا مسودہ شیئر کرے گا، جس پر حتمی اتفاقِ رائے ہوتے ہی تقریباً 1.2 ارب ڈالر کی اگلی قسط کے لیے اسٹاف لیول معاہدہ (Staff-Level Agreement) طے پا جائے گا۔