صبور علی نے ڈیڑھ سالہ بیٹی کو پری سکول بھیجنے کی وجہ بتا دی

پاکستانی اداکارہ صبور علی نے اپنی ڈیڑھ سالہ بیٹی سیرینا کو پری سکول بھیجنے کے فیصلے پر کھل کر بات کرتے ہوئے کہا ہے کہ اس اقدام سے بچی کی سماجی صلاحیتوں میں بہتری آ رہی ہے۔ ایک نجی ٹی وی پروگرام میں گفتگو کرتے ہوئے اداکارہ نے بتایا کہ سیرینا روزانہ صرف 15 سے 20 منٹ سکول میں گزارتی ہے، جہاں وہ دوسرے بچوں کے ساتھ کھیلتی ہے۔ صبور علی کے مطابق اس سرگرمی کا مقصد بچی کو والدین سے کچھ وقت دور رہنے اور دوسروں کے ساتھ گھلنے ملنے کا عادی بنانا ہے۔ انہوں نے بتایا کہ پہلے دن رونے کے باوجود اب سیرینا سکول جانے میں بھرپور دلچسپی لے رہی ہے۔ سوشل میڈیا پر اس فیصلے پر صارفین کی جانب سے ملا جلا ردعمل سامنے آیا ہے جہاں بعض افراد نے اتنی کم عمر میں سکول بھیجنے پر تنقید کی ہے تو وہیں مداحوں نے اس فیصلے کی حمایت بھی کی ہے۔