پاکستان پولینڈ تعلقات کو مضبوط شراکت داری میں بدلنے کے خواہاں ہیں: وزیراعظم

وزیراعظم محمد شہباز شریف سے پولینڈ کے وزیر اور کونسل آف منسٹرز کے رکن ٹوماش شیمونیاک نے ملاقات کی، جس میں تجارت، کاروباری روابط اور علاقائی صورتحال پر تفصیلی تبادلہ خیال کیا گیا۔ وزیراعظم نے پاک پولینڈ تعلقات پر اطمینان کا اظہار کرتے ہوئے تاریخی دوستی کو کثیر الجہتی شراکت داری میں بدلنے کے عزم کا اعادہ کیا اور بزنس کمیونٹی کے درمیان رابطے بڑھانے پر زور دیا۔ انہوں نے جی ایس پی پلس اسکیم پر پاکستان کی حمایت کرنے پر پولینڈ کا شکریہ بھی ادا کیا۔ ملاقات کے دوران مشرق وسطیٰ سمیت اہم علاقائی امور پر گفتگو کرتے ہوئے وزیراعظم نے تنازعات کے پرامن حل کے لیے سفارت کاری اور مذاکرات کی اہمیت پر زور دیا۔