بانی پی ٹی آئی کے بغیر کوئی فیصلہ نہیں کریں گے: سلمان اکرم راجہ

پاکستان تحریک انصاف کے سیکرٹری جنرل سلمان اکرم راجہ نے اسلام آباد میں پریس کانفرنس کرتے ہوئے کہا ہے کہ پارٹی بانی چیئرمین کے بغیر کوئی فیصلہ نہیں کرے گی، اور حکومت کے ساتھ مذاکرات میں دو اہم نکات پر ڈیڈ لاک برقرار رہا۔ انہوں نے بتایا کہ مذاکرات کے دوران بانی پی ٹی آئی تک ذاتی معالجین کی رسائی اور خیبر پختونخوا میں دہشت گردی کے خاتمے کے لیے سیاسی جرگے کی سفارشات پر حکومت لچک دکھانے کو تیار نہیں تھی۔ سلمان اکرم راجہ کا کہنا تھا کہ ایک وقت میں مذاکرات کامیابی کے قریب تھے اور تمام اسیران کی رہائی پر بھی مثبت بات چیت جاری تھی، لیکن اچانک حکومتی رویے نے معاملات کو بگاڑ دیا۔ دوسری جانب، اسلام آباد ہائیکورٹ میں میڈیا سے گفتگو کرتے ہوئے وکیل بیرسٹر سلمان صفدر نے شکوہ کیا کہ عدالتوں کے فیصلوں پر عمل درآمد نہیں کیا جا رہا۔