ہمارے کارکن پرامن ہیں، گولی نہیں چلنی چاہیے: بیرسٹر گوہر

تحریک انصاف کے چیئرمین بیرسٹر گوہر خان نے سوات میں میڈیا سے گفتگو کرتے ہوئے کہا ہے کہ جمہوریت میں پرامن احتجاج ہر سیاسی جماعت کا آئینی حق ہے اور ہمارے کارکن پرامن ہیں اس لیے ان پر طاقت کا استعمال نہیں ہونا چاہیے۔ انہوں نے حکومت پر تنقید کرتے ہوئے کہا کہ مذاکرات کے معاملے میں سنجیدگی کا مظاہرہ نہیں کیا جا رہا، جنگوں کے دوران بھی مذاکرات ہوتے ہیں، اس لیے اگر حکومت مذاکرات میں مخلص ہے تو فوری طور پر بانی پی ٹی آئی سے ملاقات کرائی جائے۔ بیرسٹر گوہر نے مزید کہا کہ دہشت گردی کے خلاف پی ٹی آئی کی پالیسی زیرو ٹالرنس کی ہے، تاہم خیبر پختونخوا میں امن و امان کا قیام گورنر راج یا ایمرجنسی سے نہیں بلکہ مؤثر اقدامات سے ہی ممکن ہے۔