اسلام آباد ناکام ہو چکا تو تھر والوں کو موقع دیں، مزید صوبے حل نہیں: بلاول بھٹو

چیئرمین پاکستان پیپلزپارٹی بلاول بھٹو زرداری نے تھرکول بلاک ٹو کے توسیعی منصوبے فیز تھری کا افتتاح کر دیا۔ اس موقع پر تقریب سے خطاب کرتے ہوئے انہوں نے کہا کہ تھر کی تیز رفتار ترقی کچھ عناصر کو ہضم نہیں ہو رہی اور سیاسی یتیم کراچی میں نفرت اور تقسیم کی سیاست کرنے میں مصروف ہیں۔ بلاول بھٹو زرداری کا کہنا تھا کہ ایم ڈی کیٹ کے امتحانات میں تھر کے بچے ٹاپ کرتے ہیں لیکن مبارکباد دینے کے بجائے ان کے خلاف منفی سیاست کی جاتی ہے۔ مزید برآں، صوبے بنانے کی بحث پر ردعمل دیتے ہوئے انہوں نے طنزیہ انداز میں کہا کہ اگر وفاقی نظام ناکام ہو چکا ہے تو اسلام آباد کو تھرپارکر کے عوام کے حوالے کر دیا جائے تاکہ وہاں بھی تھر جیسی ترقی ممکن ہو سکے۔