زندگی کی 70 بہاریں دیکھ لیں، عمر بتانے میں کبھی عار محسوس نہیں ہوئی: بشریٰ انصاری

پاکستان کی سینئر اور محبوب اداکارہ بشریٰ انصاری نے انکشاف کیا ہے کہ وہ زندگی کی 70 بہاریں دیکھ چکی ہیں اور انہیں اپنی حقیقی عمر بتانے میں کبھی کوئی عار یا ہچکچاہٹ محسوس نہیں ہوئی۔ ایک حالیہ ایونٹ میں گفتگو کرتے ہوئے انہوں نے کہا کہ وہ سب کو فخر کے ساتھ بتاتی ہیں کہ ان کی عمر 70 برس ہے اور انہوں نے کبھی بھی اپنی عمر چھپانے کی کوشش نہیں کی۔

بشریٰ انصاری نے ایک دلچسپ قصہ سناتے ہوئے بتایا کہ ایک بار کسی نے ان سے پوچھا کہ وہ اپنی عمر کیوں ظاہر کر دیتی ہیں، جس پر انہوں نے مزاحیہ انداز میں جواب دیا کہ “میری کون سی فلمیں چل رہی ہیں جو میں عمر چھپاتی پھروں۔” انہوں نے مزید کہا کہ اگر کوئی 70 سال کی عمر میں 50 کا نظر آتا ہے تو یہ خوش آئند بات ہے۔ اپنی فٹنس کے راز پر بات کرتے ہوئے اداکارہ کا کہنا تھا کہ انہوں نے ہمیشہ کم وزن کے ساتھ زندگی گزاری ہے، ماضی میں دبلی پتلی ہونے پر تنقید کا سامنا بھی رہا لیکن آج وہی فٹنس ان کے کام آ رہی ہے۔