پاکستان اور افغان وفود ماسکو فارمیٹ اجلاس میں ایک میز پر بیٹھیں گے

ماسکو میں 5 اکتوبر کو ہونے والے “ماسکو فارمیٹ” کے آٹھویں مشاورتی اجلاس میں پاکستان اور افغانستان کے وفود آمنے سامنے ہوں گے۔ تاہم دونوں ممالک کے درمیان جاری شدید سفارتی اور سیکیورٹی کشیدگی کے باعث پاکستانی اور افغان طالبان وفود کے مابین کسی الگ دوطرفہ ملاقات کا امکان تاحال طے نہیں ہو سکا ہے۔ سفارتی ذرائع کے مطابق بارڈر سیکیورٹی خدشات اور سرحدی کشیدگی کے ماحول میں انعقاد پذیر اس اجلاس میں افغانستان کے لیے پاکستان کے خصوصی نمائندے محمد صادق پاکستانی وفد کی قیادت کر رہے ہیں۔ پاکستانی وفد میں وزارتِ خارجہ کے ڈائریکٹر جنرل (افغانستان، ایران و ترکیہ) نعیم اقبال چیمہ، کابل میں پاکستان کے سفیر عبید الرحمن نظامانی اور روس میں پاکستانی سفیر فیصل نیاز ترمذی شامل ہیں۔

دوسری جانب افغان طالبان وفد کی قیادت ان کے وزیرِ خارجہ امیر خان متقی کر رہے ہیں۔ اگرچہ دونوں وفود علاقائی سیکیورٹی اور باہمی تعلقات جیسے موضوعات پر مشترکہ اجلاس میں موجود ہوں گے، تاہم محمد صادق اور امیر خان متقی کی باضابطہ ون آن ون ملاقات کے سوال پر طالبان حکام نے واضح کیا ہے کہ انہوں نے کسی الگ دوطرفہ ملاقات کی درخواست نہیں کی ہے۔ اس کے باوجود، خطے کی موجودہ صورتحال اور کشیدگی کے تناظر میں ایک ہی فورم پر دونوں ممالک کی شرکت کو انتہائی اہم قرار دیا جا رہا ہے۔