گورنر راج یا ایمرجنسی سے پہلے سیاسی جماعتوں کو راستہ تلاش کرنا چاہیے: بلاول بھٹو

پاکستان پیپلز پارٹی کے چیئرمین بلاول بھٹو زرداری نے وفاقی حکومت اور تمام سیاسی قوتوں پر زور دیا ہے کہ ملک میں گورنر راج یا ایمرجنسی جیسے سخت آئینی اقدامات سے قبل سیاسی جماعتوں کو مل بیٹھ کر گفت و شنید کے ذریعے مسائل کا حل تلاش کرنا چاہیے۔ کراچی میں سیوریج ٹریٹمنٹ پلانٹ کے افتتاح کے موقع پر میڈیا اور تقریب سے خطاب کرتے ہوئے انہوں نے کہا کہ گورنر راج یا ایمرجنسی اگرچہ آئینی ہتھیار ہیں تاہم ’بم گرانے سے پہلے سیاسی حل تلاش کرنا چاہیے‘۔ انہوں نے وفاقی حکومت کو پی ٹی آئی کے ساتھ باقاعدہ مذاکرات کا مشورہ دیتے ہوئے وفاق اور خیبرپختونخوا کے درمیان دہشت گردی سے نمٹنے کے لیے فوری معاہدے کی ضرورت پر زور دیا۔

بلاول بھٹو زرداری نے سندھ اور کراچی کے ساتھ پانی اور گیس کی غیر مساوی تقسیم پر بھی شدید تحفظات کا اظہار کیا۔ انہوں نے کہا کہ واٹر ایکارڈ کے تحت کراچی اور سندھ کو ان کے حصے کا پانی اور گیس نہیں مل رہی، اس کے باوجود صوبے کا مذاق اڑایا جاتا ہے۔ ملکی سلامتی پر بات کرتے ہوئے ان کا کہنا تھا کہ دہشت گردی کو سیاسی کے بجائے قومی مسئلہ سمجھنا ہوگا کیونکہ افغانستان سے ہونے والے حملوں اور خیبرپختونخوا و بلوچستان کی بدامنی کے اثرات راست کراچی تک پہنچتے ہیں، جبکہ ان کے پیچھے بھارتی ہاتھ ہونا بھی کسی سے ڈھکا چھپا نہیں ہے۔