ڈیڈ لاک برقرار، حکومت اور اپوزیشن میں جاری مذاکرات بغیر کسی نتیجے کے ختم

انسدادِ دہشت گردی کے امور پر شدید اختلافِ رائے اور ڈیڈ لاک پیدا ہونے کے باعث حکومت اور اپوزیشن کی اہم مذاکراتی نشست بے نتیجہ ختم ہو گئی، جس کے بعد مذاکراتی کمیٹی کے اراکین سپیکر چیمبر سے روانہ ہو گئے۔ ذرائع کے مطابق قومی اسمبلی کے سپیکر ایاز صادق کے چیمبر میں ہفتے کی دوپہر سے جاری مذاکرات اس وقت تعطل کا شکار ہوئے جب پاکستان تحریک انصاف (پی ٹی آئی) دہشت گردی سے متاثرہ علاقوں میں ضروری انتظامی اقدامات کی تائید سے پیچھے ہٹ گئی۔ حکومتی وفد نے واضح کیا کہ اگر انسدادِ دہشت گردی کے بنیادی معاملے پر پیشرفت نہیں ہوتی تو دیگر سیاسی مطالبات پر بھی بات آگے نہیں بڑھے گی۔

مذاکرات میں حکومت کی نمائندگی وفاقی وزیر داخلہ محسن نقوی، رانا ثناء اللہ، امیر مقام، طلال چوہدری اور طارق فضل چوہدری نے کی، جبکہ پیپلز پارٹی کی جانب سے سینیٹر شیری رحمان، نوید قمر اور اعجاز جاکھرانی شریک ہوئے۔ دوسری جانب اپوزیشن کے وفد میں بیرسٹر گوہر، قائدِ حزبِ اختلاف سینیٹ علامہ ناصر عباس، اسد قیصر، سلمان اکرم راجہ اور عامر ڈوگر شامل تھے۔ اپوزیشن رہنما علامہ ناصر عباس نے میڈیا کو بتایا کہ بانی پی ٹی آئی سے ملاقات اور حتمی مشاورت کے بغیر معاملات طے نہیں ہو سکتے۔ مذاکرات کے دوران وزیر داخلہ محسن نقوی نے مسودے پر صدر مملکت آصف علی زرداری، اعلیٰ سیاسی قیادت اور قانونی ماہرین سے اہم مشاورت بھی کی۔