اسلام آباد ایئرپورٹ پر ایک ہفتے میں دو بڑی کارروائیاں، 47 کلوگرام مشتبہ منشیات برآمد

اسلام آباد انٹرنیشنل ایئرپورٹ پر کسٹمز حکام نے منشیات کی انسدادِ سمگلنگ کی بڑی مہم کے دوران ایک ہفتے کے اندر 2 مختلف کارروائیوں میں مجموعی طور پر 47 کلوگرام مشتبہ منشیات برآمد کر کے غیر ملکی شہری سمیت ملزمان کو گرفتار کر لیا ہے۔ پہلی کارروائی 2 اکتوبر 2026ء کو تھائی ایئرویز کی پرواز TG-349 کے ذریعے آمد پر کی گئی، جہاں کسٹمز کی خصوصی ویجیلنس ٹیم نے تلاشی کے دوران تھائی لینڈ کے شہری (Naeehaphong Pueehykosai) کے قبضے سے 23 کلوگرام کینابس (ویڈ) برآمد کی۔ عالمی مارکیٹ میں اس ویڈ کی مالیت تقریباً 3 کروڑ 10 لاکھ روپے بتائی گئی ہے۔

دوسری کارروائی میں خفیہ اطلاع کی بنیاد پر بیرونِ ملک سے آنے والے ایک اور مسافر کو روک کر تلاشی لی گئی جس کے سامان سے 24 کلوگرام اعلیٰ کوالٹی کی حشیش برآمد ہوئی، جس کی بین الاقوامی مارکیٹ میں قدر 31 کروڑ روپے کے قریب ہے۔ کسٹمز حکام نے بتایا کہ اس سے قبل 28 ستمبر کو بھی ایئرپورٹ سے 55 کروڑ روپے مالیت کی حشیش تحویل میں لی گئی تھی۔ تمام گرفتار مسافروں کے خلاف انسدادِ منشیات کے تحت مقدمات درج کر کے مزید قانونی تفتیش شروع کر دی گئی ہے۔