وزیراعلیٰ خیبرپختونخوا کا آج سے لانگ مارچ شروع کرنے کا اعلان

وزیراعلیٰ خیبرپختونخوا سہیل خان آفریدی نے آئین و قانون کی بالادستی کے لیے آج سے صوبے میں لانگ مارچ کے باضابطہ آغاز کا اعلان کر دیا ہے۔ سوشل میڈیا پلیٹ فارم ‘ایکس’ (سابقہ ٹوئٹر) پر جاری کردہ اپنے بیان میں انہوں نے بتایا کہ یہ لانگ مارچ لکی مروت سے شروع ہوگا اور کرک، کوہاٹ، پشاور اور چارسدہ سے گزرتا ہوا آگے بڑھے گا، جبکہ 8 اکتوبر کو مارچ کے تمام شرکا خیر آباد کے مقام پر جمع ہوں گے۔

وزیراعلیٰ خیبرپختونخوا نے اپنے عزم کا اعادہ کرتے ہوئے کہا کہ ملک میں آئین کی حکمرانی اور قانون کی بالادستی کے لیے تحریک انصاف کی جدوجہد مسلسل جاری رہے گی۔ ان کا مزید کہنا تھا کہ تحریک انصاف کے تمام پیش کردہ مطالبات مکمل طور پر آئین اور قانون کے دائرے میں ہیں اور ملک کے تمام عوام کو پرامن احتجاج ریکارڈ کرانے کا مکمل آئینی و جمہوری حق حاصل ہے۔