کراچی کے لیے اضافی پانی کی فراہمی جلد شروع ہوجائے گی، مراد علی شاہ

وزیراعلیٰ سندھ سید مراد علی شاہ نے اعلان کیا ہے کہ کراچی کے شہریوں کے لیے اضافی پانی کی فراہمی کا سلسلہ جلد شروع ہو جائے گا، جبکہ شہر کی صنعتوں کے لیے 35 ملین گیلن یومیہ (MGD) ری سائیکل شدہ پانی کی فراہمی کا منصوبہ بھی پبلک پرائیویٹ پارٹنرشپ (PPP) کے تحت مکمل کر لیا گیا ہے۔ کراچی میں سیوریج ٹریٹمنٹ پلانٹ کے باضابطہ آغاز کی تقریب سے خطاب کرتے ہوئے انہوں نے کہا کہ محض تختیوں کے افتتاح کے بجائے عوام کو عملی طور پر منصوبوں سے فائدہ پہنچانا ہی حکومت کی حقیقی کامیابی اور انعام ہے۔

تقریب کے دوران میئر کراچی مرتضیٰ وہاب نے مزید تفصیلات بتاتے ہوئے کہا کہ لیاری کو 10 ملین گیلن یومیہ پانی کا نیا منصوبہ دیا جا رہا ہے، جبکہ مچھر کالونی، کلفٹن اور ڈی ایچ اے کے علاقوں کے لیے بھی واٹر سپلائی سکیموں پر کام جاری ہے۔ انہوں نے کہا کہ صنعتی علاقوں کی بنیادی انفراسٹرکچر اور سڑکوں کی بہتری کے لیے عملی اقدامات کیے جا رہے ہیں اور پاکستان پیپلز پارٹی اپنے انتخابی منشور پر مسلسل عملدرآمد کر رہی ہے۔