پی ٹی آئی لانگ مارچ کیلئے چندہ مہم، کارکنوں نے چندہ دینا شروع کر دیا

پاکستان تحریکِ انصاف (پی ٹی آئی) نے اپنے متوقع لانگ مارچ کے اخراجات اور تیاریوں کے سلسلے میں باقاعدہ چندہ مہم کا آغاز کر دیا ہے، جس کے بعد پارٹی کارکنان کی جانب سے فنڈز جمع کروانے کا سلسلہ تیز ہو گیا ہے۔ وزیراعلیٰ خیبرپختونخوا سہیل آفریدی نے خود اس چندہ مہم میں شرکت کی، جہاں انہوں نے کارکنوں کے ساتھ مل کر لانگ مارچ کے لیے فنڈز جمع کیے۔

اس موقع پر ذرائع ابلاغ سے گفتگو کرتے ہوئے وزیراعلیٰ سہیل آفریدی نے کہا کہ حکومتی کمیٹی کے ساتھ جاری مذاکرات کے حوالے سے انہیں فی الحال مکمل تفصیلات موصول نہیں ہوئی ہیں، تاہم پارٹی کے مطالبات کے بارے میں پی ٹی آئی کے چیئرمین بیرسٹر گوہر خان کو واضح طور پر آگاہ کیا جا چکا ہے۔ انہوں نے مزید بتایا کہ بیرسٹر گوہر پشاور پہنچ رہے ہیں، جس کے بعد وہ تمام تر صورتحال اور اگلے لائحہ عمل سے میڈیا کو تفصیل سے آگاہ کریں گے۔