امریکی حکومت کا نیا AI پورٹل ‘America.gov’ لانچ، جیمنائی اور گرک ماڈلز سے لیس چیٹ بوٹ متعارف

امریکی حکومت نے شہریوں کو مختلف سرکاری ویب سائٹس اور خدمات سے متعلق معلومات فراہم کرنے کے لیے آرٹیفیشل انٹیلی جنس (AI) پر مبنی نیا پورٹل ‘America.gov’ باضابطہ طور پر متعارف کروا دیا ہے۔ چیف ڈیزائن آفیسر جو گیبیا (Joe Gebbia) کے مطابق یہ جدید چیٹ بوٹ گوگل کے ‘جیمنائی’ (Gemini) اور ایلن مسک کے ‘گرک’ (Grok) ماڈلز کی مدد سے تیار کیا گیا ہے۔ واشنگٹن میں منعقدہ تقریب کے دوران امریکی صدر ڈونلڈ ٹرمپ اور نائب صدر جے ڈی وینس کی موجودگی میں اس کا باضابطہ افتتاح کیا گیا۔

یہ نیا آرٹیفیشل انٹیلی جنس سسٹم تقریباً 29 ہزار سرکاری اور عام استعمال کی ویب سائٹس کے ڈیٹا بیس سے منسلک ہے، جو شہریوں کو پاسپورٹ کی تجدید، ہیلتھ کیئر اور دیگر حکومتی سروسز کے پیچیدہ سوالات کے فوری اور آسان جوابات فراہم کرتا ہے۔ ابتدائی مرحلے میں یہ ٹول معلومات اور گائیڈ لائنز فراہم کرے گا، جبکہ اگلے مرحلے میں شہریوں کے پاسپورٹ اور فارمز کی آن لائن پروسیسنگ بھی اسی پورٹل کے ذریعے ممکن بنائی جائے گی۔