سلمان خان کا جعلی اے آئی ویڈیوز بنانے والوں کو جیل بھیجنے کا مطالبہ

بالی ووڈ سپر اسٹار سلمان خان نے مصنوعی ذہانت (اے آئی) اور ڈیپ فیک ٹیکنالوجی کے ذریعے جعلی ویڈیوز اور آوازیں تیار کر کے پھیلانے والوں کے خلاف سخت قانونی کارروائی اور جیل کی سزا کا مطالبہ کیا ہے۔ ریئلٹی شو ‘بگ باس 20’ کے دوران گفتگو کرتے ہوئے سلمان خان نے اے آئی کے غلط استعمال پر شدید تشویش کا اظہار کیا اور انکشاف کیا کہ وہ خود بھی اس قسم کی جعل سازی اور جعلی ویڈیوز کا شکار بن چکے ہیں۔ ان کا کہنا تھا کہ اے آئی کے ذریعے کسی کی آواز ڈب کرنا یا ایسی ویڈیوز بنانا انتہائی خطرناک اور سنجیدہ معاملہ ہے جس میں لوگوں کے جلی بیانات یا سچائی سے ہٹ کر مواد وائرل کر دیا جاتا ہے۔

سلمان خان نے واضح کیا کہ اگر کوئی عام صارف حقیقت سے ناواقفیت کی بنا پر ایسی ویڈیو شیئر کر دیتا ہے تو بات الگ ہے، لیکن جو لوگ جان بوجھ کر جعلی اے آئی مواد تیار کرتے ہیں انہیں سزا ملنی چاہیے۔ ان کا کہنا تھا کہ جب تک ایسے ایک یا دو عناصر کو جیل نہیں بھیجا جائے گا، یہ سلسلہ بند نہیں ہوگا۔ اداکار نے سوشل میڈیا کے لیے باضابطہ سینسرشپ اور سخت قوانین کی ضرورت پر زور دیتے ہوئے کہا کہ آن لائن پلیٹ فارمز پر غنڈہ گردی اور ہراساں کیے جانے والے رویوں کی روک تھام کے لیے لوگوں کو ان کے مواد کا جواب دہ بنایا جائے۔ انہوں نے عام شہریوں کی مشکلات کا بھی ذکر کیا کہ شوبز شخصیات تو سائبر سیل سے رابطہ کر سکتی ہیں، لیکن عام آدمی کے پاس اس سائبر کرائم سے نمٹنے کے لیے وسائل موجود نہیں ہوتے۔