پاکستان کا نام روشن کرنے والی ڈیزائنر سے انٹرویو میں جم کے کپڑوں پر سوال، نادیہ خان تنقید کی زد میں

عالمی سطح پر معروف نیویارک فیشن ویک میں پاکستان کا نام روشن کرنے اور ملک کی شاندار نمائندگی کرنے والی نامور پاکستانی فیشن ڈیزائنر اور عامر عدنان برینڈ کی سی ای او پریشے عدنان نے وطن واپسی پر ایک ٹی وی انٹرویو کے دوران پوچھے گئے نامناسب سوالات پر سخت ناراضی کا اظہار کیا ہے۔

حال ہی میں میزبان نادیہ خان نے پریشے عدنان کا ایک انٹرویو کیا، جس دوران ان کے پروفیشنل کام، فیشن انڈسٹری کی ترقی یا بین الاقوامی سطح پر ملنے والی کامیابیوں پر گفتگو کرنے کے بجائے ان کی نجی زندگی اور ذاتی نوعیت کے امور کو زیرِ بحث لایا گیا۔ انٹرویو کے دوران میزبان نادیہ خان نے پریشے سے سوال کیا کہ کیا ان کے والدین ان کے جم کلیکشن اور نسبتاً بولڈ ڈیزائنز کے لباس پہننے پر رضامند ہیں؟ اس پر پریشے نے تحمل کا مظاہرہ کرتے ہوئے جواب دیا کہ انہیں ہمیشہ سے اپنے والدین کی مکمل حمایت اور حوصلہ افزائی حاصل رہی ہے۔

تاہم، بعد میں پریشے عدنان نے اس بات پر شدید افسوس اور غلط قرار دیا کہ نیویارک جیسے بڑے پلیٹ فارم پر پاکستانی ثقافت اور اپنے ہنر کی نمائندگی کرنے کے بعد جب وہ وطن لوٹیں، تو ان سے ان کے جم کے کپڑوں اور سوشل میڈیا پر شیئر کی جانے والی فٹنس ریلز سے متعلق سوالات کیے گئے۔ ان کا کہنا تھا کہ ایسے بین الاقوامی فیشن ایونٹ کے بعد پیشہ ورانہ کامیابیوں کے بجائے اس قسم کے موضوعات پر بات کرنا مایوس کن ہے۔

پریشے عدنان کے اس مؤقف کو سوشل میڈیا پر صارفین کی بڑی تعداد کی جانب سے بھرپور حمایت حاصل ہوئی، جبکہ معروف پاکستانی اداکار یاسر حسین نے بھی انٹرویو میں غیر سنجیدہ موضوعات کے انتخاب پر میزبان کو کڑی تنقید کا نشانہ بنایا ہے