سینئر اداکار راشد محمود کی بیروزگاری کی ویڈیو پر عظمیٰ بخاری نے ملاقات کیلئے بلالیا

پاکستان شوبز انڈسٹری کے سینئر اور معروف اداکار راشد محمود کی بے روزگاری اور شدید مالی و طبی مشکلات سے متعلق ویڈیو وائرل ہونے کے بعد، وزیرِ اطلاعات پنجاب عظمیٰ بخاری نے ان سے ملاقات کی ہے۔ راشد محمود نے سوشل میڈیا پر اپنے ایک ویڈیو پیغام میں بتایا کہ وہ دل کے عارضے کے ساتھ ساتھ پچھلے پانچ ماہ سے مہروں کی شدید تکلیف میں مبتلا ہیں اور اس دوران ان کے پاس کوئی کام نہیں ہے، جس کے باعث وہ سنگین مالی بحران کا شکار ہیں۔

ان کا کہنا تھا کہ شوبز انڈسٹری اور ڈرامہ کی آبیاری میں ان کی نسل کا اہم کردار رہا ہے اور انہوں نے اپنی تمام زندگی اس ملک کی فنکارانہ خدمات سے جوڑ کر گزاری، لیکن اس عمر میں وہ معاشی تنگی اور بیماری کی دہری تکلیف برداشت کر رہے ہیں۔ ویڈیو کا نوٹس لیتے ہوئے صوبائی وزیر اطلاعات عظمیٰ بخاری نے سینئر اداکار سے ملاقات کر کے ان کے مسائل سنے اور حکومتِ پنجاب کی جانب سے تعاون اور سینئر فنکاروں کی مالی سرپرستی کا یقین دلایا۔