چینی صدر 3 روزہ دورے پر امریکہ پہنچ گئے، ریڈ کارپٹ استقبال، توپوں کی سلامی

چینی صدر شی جن پنگ تین روزہ سرکاری دورے پر امریکہ پہنچ گئے ہیں، جہاں ریاست کے اعلیٰ ترین فوجی و سفارتی اعزازات کے ساتھ ان کا شاندار استقبال کیا گیا۔ جوائنٹ بیس اینڈریوز (Joint Base Andrews) پہنچنے پر امریکی صدر ڈونلڈ ٹرمپ اور خاتونِ اول میلانیا ٹرمپ نے چینی صدر شی جن پنگ اور ان کی اہلیہ پینگ لی یوان کا ایئرپورٹ کے رن وے پر بچھائے گئے 100 فٹ طویل ریڈ کارپٹ پر استقبال کیا۔ اس موقع پر توپوں کی سلامی دی گئی، جبکہ امریکی فضائیہ کے دو B-1 سپرسونک بمبار طیاروں نے خصوصی فلائی پاسٹ کا مظاہرہ کیا۔ امریکی مسلح افواج کے دستوں نے سلامی دی اور ملٹری بینڈ نے دونوں ممالک کے قومی ترانے بجائے۔

استقبالیہ تقریب کے بعد صدر ٹرمپ اور صدر شی جن پنگ کے درمیان مختصر گفتگو ہوئی، جس کے بعد چینی صدر کا قافلہ واشنگٹن ڈی سی کے لیے روانہ ہو گیا۔ اس تین روزہ اہم دورے کے دوران دونوں عالمی رہنماؤں کے درمیان بند کمرے کے مذاکرات، تجارتی ٹیرف، مصنوعی ذہانت (AI)، تائیوان کے معاملے اور ایران کی جاری جنگ جیسے حساس تنازعات پر تفصیلی تبادلہ خیال متوقع ہے۔ واضح رہے کہ امریکہ اور چین کے درمیان گزشتہ برس طے پانے والے تجارتی معاہدے کی مدت نومبر میں ختم ہو رہی ہے، جس کے باعث یہ مذاکرات معاشی اور سیاسی لحاظ سے عالمی اہمیت کے حامل سمجھے جا رہے ہیں۔