اے آئی پر کچھ افراد کی اجارہ داری نہیں بلکہ عالمی تعاون ہونا چاہیے، اسحاق ڈار

پاکستان کے نائب وزیراعظم و وزیرِ خارجہ سینیٹر اسحاق ڈار نے مصنوعی ذہانت (AI) کی عالمی گورننس اور ریگولیشنز پر زور دیتے ہوئے کہا ہے کہ اس ٹیکنالوجی پر کسی ایک ملک یا کچھ مخصوص گروہوں کی اجارہ داری نہیں ہونی چاہیے، بلکہ اس کے فوائد کی تمام اقوام تک یکساں فراہمی کے لیے عالمی سطح پر تعاون قائم ہونا چاہیے۔ اقوام متحدہ کی سلامتی کونسل کے اعلیٰ سطح بریفنگ سیشن میں خطاب کرتے ہوئے انہوں نے کہا کہ مصنوعی ذہانت کی ترقی میں عالمی نمائندگی کو یقینی بنانا ضروری ہے اور ایسا عالمی فریم ورک تشکیل دیا جائے جس سے انسانیت کو درپیش خطرات کا بروقت سدباب ہو سکے۔

وزیرِ خارجہ اسحاق ڈار نے سائبر حملوں اور جعلی خبروں (Fake News) کے بڑھتے ہوئے خطرات کو مصنوعی ذہانت کے دور کا سب سے بڑا چیلنج قرار دیتے ہوئے کہا کہ تکنیکی ترقی کا کنٹرول انسان کے اپنے ہاتھ میں ہونا چاہیے۔ انہوں نے اس بات پر بھی زور دیا کہ اے آئی کی حفاظت اور ریگولیشنز کا نظام ایسا جامع ہونا چاہیے جو ٹیکنالوجی کی جدت اور ترقی کی راہ میں رکاوٹ نہ بنے، بلکہ حفاظتی اقدامات کے ساتھ اس ٹیکنالوجی کے مثبت اور محفوظ استعمال کو فروغ دے۔