امریکی پابندیوں کے باوجود ایرانی ایئرلائنز کی بین الاقوامی پروازیں جاری

واشنگٹن کی جانب سے کڑی پابندیاں عائد کیے جانے کے باوجود ایرانی ایئرلائنز کی بین الاقوامی پروازیں غیر منقطع طور پر جاری رہنے کا انکشاف ہوا ہے۔ فلائٹ ٹریکنگ ڈیٹا اور غیر ملکی میڈیا کی رپورٹس کے مطابق ایرانی ایئرلائنز نے امریکی اقتصادی و سفارتی پابندیوں کے اعلان کے فوراً بعد متحدہ عرب امارات، ترکیہ، چین، آذربائیجان، افغانستان اور تھائی لینڈ سمیت کئی اہم ممالک کے لیے اپنی فضائی سرگرمیاں جاری رکھی ہیں۔

عالمی خبر رساں ادارے بلومبرگ کے مطابق نئی امریکی پابندیوں کے نفاذ کے چند ہی گھنٹوں کے اندر ایران کے مختلف ہوائی اڈوں سے کم از کم 6 بین الاقوامی پروازیں بنکاک، شنگھائی، کابل اور دیگر منزلوں کے لیے روانہ ہوئیں۔ فلائٹ مانیٹرنگ کے اعداد و شمار سے یہ بات سامنے آئی ہے کہ امریکی پابندیوں کے اعلان کے باوجود ایران کا فضائی رابطوں کا نیٹ ورک مکمل طور پر معطل کرنے کا ہدف حاصل نہیں ہو سکا اور اس کی پروازیں باقاعدگی سے آپریشنل ہیں۔