فلسطین کی آزادی کے نعرے لگانے پر میکل مور کو ایڈ شیرن کے ٹور سے باہر

مشہور امریکی ریپر اور فنکار میکل مور (Macklemore) کو کنسرٹ کے دوران فلسطین کی آزادی کے حق میں نعرے لگانے پر برطانوی گلوکار ایڈ شیرن (Ed Sheeran) کے جاری امریکی میوزک ٹور سے باہر کر دیا گیا ہے۔ رپورٹس کے مطابق ٹور انتظامیہ کو آگاہ کیا گیا کہ جن امریکی اسٹیڈیمز اور بڑے مقامات پر کنسرٹس کی میزبانی طے تھی، ان کے مالکان اور انتظامیہ نے میکل مور کو پرفارم کرنے کی اجازت دینے سے صاف انکار کر دیا، جس کے بعد یہ اقدام اٹھایا گیا۔

اس فیصلے سے قبل اسرائیلی امریکن کونسل (IAC) کی جانب سے میکل مور کے خلاف ایک منظم مہم کا آغاز بھی کیا گیا تھا، جس میں ان کے بائیکاٹ کا مطالبہ شامل تھا۔ واضح رہے کہ میکل مور طویل عرصے سے فلسطینیوں کے حقوق کے سرگرم حامی رہے ہیں اور وہ غزہ پر اسرائیلی عسکری حملوں، غیر قانونی قبضے اور انسانی حقوق کی خلاف ورزیوں کے خلاف کھل کر آواز اٹھاتے رہے ہیں۔

دوسری جانب برطانوی گلوکار ایڈ شیرن نے اس معطلی کے معاملے پر وضاحت جاری کرتے ہوئے کہا ہے کہ میکل مور کو ٹور سے الگ کرنے کا فیصلہ ان کا ذاتی نہیں تھا بلکہ اسٹیڈیم مالکان کے انکار اور انتظامی تحفظات کے باعث یہ فیصلہ کرنا پڑا۔ انہوں نے واضح کیا کہ ایونٹ کی میزبانی کرنے والے مقامات کی شرائط اور دباؤ کے باعث یہ قدم اٹھانا پڑا۔