ڈرون حملوں کے بعد سعودی عرب نے یورپ کیلئے تیل کی سپلائی روک دی

سعودی عرب نے اپنی اہم ‘ایسٹ ویسٹ آئل پائپ لائن’ (East-West Pipeline) پر ڈرون حملوں کے بعد یورپی ممالک کے لیے خام تیل کی متعدد سپلائیز منسوخ کر دی ہیں، جس کے باعث عالمی انرجی مارکیٹ میں تشویش کی لہر دوڑ گئی ہے اور یورپی خریداروں نے متبادل ذرائع کی تلاش شروع کر دی ہے۔ خبر رساں ایجنسی ‘رائٹرز’ کے مطابق تجارتی ذرائع نے تصدیق کی ہے کہ سعودی عرب نے یورپی صارفین کو ستمبر میں لوڈ ہونے والے خام تیل کے کئی کارگو کی منسوخی سے آگاہ کر دیا ہے، جبکہ بحیرہ احمر پر واقع ینبع کی اہم بندرگاہ سے بھی تیل کی لوڈنگ کی سرگرمیاں معطل کر دی گئی ہیں۔ سعودی حکام نے ان ڈرون حملوں کا الزام ایک عراقی ملیشیا پر عائد کیا ہے۔

ان حملوں کے نتیجے میں سعودی حکام نے مشرق سے مغرب تک پھیلی اس اہم پائپ لائن کو بند کر دیا ہے، جو گزشتہ چھ ماہ کے دوران آبنائے ہرمز کی بندش کے اثرات سے سعودی تیل کی برآمدات کو محفوظ رکھنے میں کلیدی کردار ادا کر رہی تھی۔ اس بندش کے بعد بالخصوص پولینڈ سمیت دیگر یورپی ممالک نے سپلائی میں متوقع کمی کو پورا کرنے کے لیے فوری متبادل راستے اور نئے سپلائرز تلاش کرنا شروع کر دیے ہیں۔ تجارتی ذرائع کے مطابق، سعودی عرب اب ممکنہ طور پر آبنائے ہرمز کے ذریعے ‘ڈارک شپمنٹس’ کے غیر روایتی طریقوں سے تیل برآمد کرنے پر غور کر سکتا ہے، جیسا کہ متحدہ عرب امارات اور عراق پہلے ہی کر رہے ہیں۔ رپورٹ کے مطابق ایسی خفیہ ترسیلات کے ذریعے خلیجی ممالک جنگ سے پہلے کی سطح کے مقابلے میں 30 سے 40 فیصد یعنی تقریباً 70 لاکھ سے 90 لاکھ بیرل یومیہ تیل کی برآمدات برقرار رکھنے میں کامیاب ہوئے ہیں۔