ملائیشیا کا اسرائیلی فوج کیلئے امداد کو اپنے ملک سے گزرنے کی اجازت نہ دینے کا اعلان

ملائیشیا کے وزیرِ اعظم انور ابراہیم نے واضح اعلان کیا ہے کہ اسرائیلی فوج یا عسکری مقاصد کے لیے بھیجی جانے والی کسی بھی سامان کی کھیپ کو ملائیشیا کی زمین یا سمندری راستوں سے گزرنے کی ہرگز اجازت نہیں دی جائے گی۔ سوشل میڈیا پلیٹ فارم “ایکس” پر جاری کردہ ایک بیان میں انور ابراہیم نے کہا کہ ملائیشیا کو ایسے کسی بھی لاجسٹک راستے کے طور پر استعمال نہیں ہونے دیا جائے گا جو اسرائیلی فوجی صلاحیتوں کو تقویت دے یا فلسطینیوں سمیت دیگر بے گناہ انسانوں کے خلاف مظالم اور جارحیت کا ذریعہ بنے۔

وزیرِ اعظم انور ابراہیم نے مزید کہا کہ ملک میں داخل ہونے والی تمام مشتبہ سامان کی کھیپوں کا ملائیشین قوانین کے مطابق باریک بینی سے معائنہ اور تحقیقات کی جائیں گی، اور قانون کی خلاف ورزی ثابت ہونے کی صورت میں بلا امتیاز فیصلہ کن کارروائی عمل میں لائی جائے گی۔ ان کا یہ بیان امریکی خبر رساں ادارے بلوم برگ کی اس رپورٹ کے بعد سامنے آیا ہے جس میں انکشاف کیا گیا تھا کہ ملائیشین حکام نے ملک کی سب سے بڑی بندرگاہ پر اسرائیل جانے والی تمام ترسیلات روک دی ہیں۔ اس سلسلے میں حکام نے گزشتہ ماہ 19 اگست کو بھی 3 مشتبہ کنٹینرز روکے تھے۔ واضح رہے کہ ملائیشیا کے اسرائیل کے ساتھ کسی قسم کے سفارتی یا تجارتی تعلقات قائم نہیں ہیں۔