صومالی صدر کی رابطہ عالم اسلامی کے سیکرٹری جنرل سے ملاقات، انسانی خدمات پر تبادلہ خیال

صومالیہ کے صدر ڈاکٹر حسن شیخ محمد نے دارالحکومت موغادیشو میں واقع صدارتی محل میں ‘رابطہ عالم اسلامی’ (Muslim World League) کے سیکرٹری جنرل اور مسلم علماء کونسل کے سربراہ شیخ ڈاکٹر محمد بن عبدالکریم العیسیٰ کا پرخلوص خیرمقدم کیا۔ عالمی میڈیا رپورٹس کے مطابق اس اعلیٰ سطح ملاقات کے دوران صومالیہ میں رابطہ عالم اسلامی کی جانب سے جاری مذہبی، فکری، تعلیمی اور انسانی خدمات سے متعلق امور پر تفصیلی تبادلہ خیال کیا گیا۔ صومالی صدر نے بحرانوں سے نمٹنے اور صومالی عوام کی پائیدار حمایت و امداد کے سلسلے میں رابطہ عالم اسلامی کی کوششوں کو اعلیٰ الفاظ میں سراہا۔

دورے کے دوران رابطہ عالم اسلامی کے سیکرٹری جنرل شیخ محمد بن عبدالکریم العیسیٰ نے صومالیہ کے جید علماء، مفتیانِ کرام اور فکری رہنماؤں کے ساتھ ایک جامع علمی و فکری نشست میں بھی شرکت کی اور اہم دینی مسائل پر گفتگو کی۔ اس موقع پر “صومالیہ عالمِ اسلام کے قلب میں” کے عنوان سے ایک خصوصی فکری فورم کا بھی انعقاد کیا گیا، جس میں صومالیہ اور امتِ مسلمہ کے مابین تاریخی و ثقافتی تعلقات کو مزید مضبوط بنانے اور خطے میں امن و استحکام کے فروغ پر زور دیا گیا۔