برصغیر کے نامور اداکار لہری کی آج 14ویں برسی منائی جا رہی ہے

کراچی: اردو فلم انڈسٹری میں سنجیدہ اور باوقار مزاح کو اعلیٰ ترین بلندیوں تک پہنچانے والے برصغیر کے نامور و مایہ ناز اداکار سفیر اللہ المعروف ’لہری‘ کی 14 ویں برسی آج منائی جا رہی ہے۔اپنے سنجیدہ چہرے پر مزاح کا جادو جگانے والے لہری نے چار دہائیوں سے زائد عرصے تک شائقینِ فلم کے دلوں پر راج کیا۔ انہوں نے اپنے مخصوص دھیمے اندازِ گفتگو، برجستہ جملوں اور متانت پر مبنی مزاح کے ذریعے برصغیر پاک و ہند کی سینما ہسٹری میں مزاحیہ اداکاری کا ایک نیا اور لاثانی معیار قائم کیا۔ 2 جنوری 1929ء کو بھارت کے شہر کانپور میں پیدا ہونے والے لہری نے 1950ء کی دہائی میں پاکستان انڈسٹری میں اپنے فلمی سفر کا آغاز کیا۔ انہوں نے ’دامن‘، ’تلاش‘، ’کنیز‘ اور ’تہذیب‘ جیسے درجنو ں یادگار فلموں میں اپنی بہترین اور لازوال اداکاری کے جوہر دکھائے۔ ان کی بے مثال فنکارانہ صلاحیتوں کے اعتراف میں انہیں 12 مرتبہ باوقار ’نگار ایوارڈ‘ سے بھی نوازا گیا۔اداکار لہری کی سب سے بڑی خصوصیت یہ تھی کہ وہ بغیر کسی ابتذال، جگت بازی یا بناوٹی تاثرات کے محض اپنے بر محل مکالموں اور چہرے کی قدرتی تحریر سے شائقین کو ہنسانے اور مسکرانے پر مجبور کر دیتے تھے۔13 ستمبر 2012ء کو لکھوکھا مداحوں اور فلمی دنیا کو سوگوار چھوڑ کر اس فانی دنیا سے کوچ کر جانے والے لہری آج ہم میں موجود نہیں ہیں، لیکن ان کا لازوال فن اور یادیں سینما ہسٹری میں ہمیشہ زندہ رہیں گی۔