گلوکارہ آئمہ بیگ اور زین احمد کی علیحدگی؟ ’سنگل‘ ہونے کا اشارہ

معروف پاکستانی گلوکارہ آئمہ بیگ نے فیشن برانڈ کے سی ای او زین احمد کے ساتھ اپنے تعلقات کی موجودہ صورتِ حال کی وضاحت کرتے ہوئے شوہر سے علیحدگی کی تصدیق کر دی ہے۔ گلوکارہ نے اپنے سوشل میڈیا اکاؤنٹ پر ایک حالیہ پوسٹ کے ذریعے خود کو ’سنگل‘ ظاہر کیا، جس سے دونوں کی راہیں جدا ہونے کا واضح اشارہ ملتا ہے۔ یاد رہے کہ آئمہ بیگ اور زین احمد نے گزشتہ برس اگست میں کینیڈا میں ایک سادہ اور نجی تقریب کے دوران شادی کی تھی، جس کی تصاویر بھی انہوں نے اپنے مداحوں کے ساتھ شیئر کی تھیں۔

گزشتہ کچھ عرصے سے دونوں کے درمیان مبینہ اختلافات اور ازدواجی زندگی میں کشیدگی سے متعلق خبریں گردش کر رہی تھیں۔ حال ہی میں آئمہ بیگ کی جانب سے چہرے پر چوٹ کی تصویر شیئر کیے جانے اور مشکل وقت میں تنہائی کے اشاروں نے مداحوں میں تشویش پھیلا دی تھی، جس پر تشدد کی قیاس آرائیاں بھی کی گئی تھیں۔ اب آئمہ بیگ نے ایک تقریب کی تصاویر کے ساتھ کیپشن میں خود کو ‘سنگل’ لکھ کر ان تمام افواہوں پر اپنے رویے سے مہرِ تصدیق ثبت کر دی ہے، تاہم زین احمد کی جانب سے اس معاملے پر تاحال کوئی باضابطہ بیان یا تبصرہ سامنے نہیں آیا ہے۔