درجہ حرارت میں اضافے کا امکان، متعلقہ ادارے الرٹ رہیں: این ڈی ایم اے

اسلام آباد: وزیراعظم کی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) کے ہیڈ کوارٹرز میں ایمرجنسی رسپانس کمیٹی (ERC) کا 18واں اجلاس منعقد ہوا، جس کی صدارت وفاقی وزیر برائے منصوبہ بندی و ترقی پروفیسر احسن اقبال نے کی۔

اجلاس میں چیئرمین این ڈی ایم اے لیفٹیننٹ جنرل انعام حیدر ملک، پی ڈی ایم اے، محکمہ موسمیات اور دیگر متعلقہ وفاقی و صوبائی اداروں کے نمائندگان نے شرکت کی۔ این ڈی ایم اے حکام نے ملک کی موجودہ موسمی صورتحال، درجہ حرارت میں اضافے اور دریاؤں میں پانی کے بہاؤ پر بریفنگ دیتے ہوئے بتایا کہ فی الوقت پاکستان میں مون سون کا کوئی فعال نظام موجود نہیں، تاہم مختلف علاقوں میں درجہ حرارت بڑھنے کے امکانات ہیں جس کے پیش نظر متعلقہ اداروں کو ہائی الرٹ رہنے کی ہدایت کی گئی ہے۔

وفاقی وزیر پروفیسر احسن اقبال نے تمام وفاقی، صوبائی اور ضلعی اداروں کو ہدایت کی کہ وہ کسی بھی ممکنہ موسمی یا ہائیڈرولوجیکل خطرے سے نمٹنے کے لیے باہمی رابطہ کاری مضبوط بنائیں اور آپریشنل تیاری مکمل رکھیں۔ انہوں نے کہا کہ نیشنل ایمرجنسیز آپریشن سینٹر (NEOC) کے ذریعے صورتحال کی 24 گھنٹے نگرانی کی جائے اور عوام و انتظامیہ کو بروقت ایڈوائزریز جاری کی جائیں۔