حوثیوں کا 24 گھنٹوں میں سعودی عرب کا تیسرا ڈرون مار گرانے کا دعویٰ

یمن کے حوثی باغیوں نے دعویٰ کیا ہے کہ ان کے عسکری دستوں نے صوبہ البیضا کی فضائی حدود میں پرواز کرنے والے سعودی عرب کے ایک مسلح جاسوس ڈرون کو کامیابی سے مار گرایا ہے۔ حوثیوں کے فوجی ترجمان یحییٰ سریع نے سوشل میڈیا پلیٹ فارم ٹیلی گرام پر جاری کردہ اپنے باضابطہ بیان میں بتایا کہ یہ چینی ساختہ ‘ونگ لونگ ٹو’ (Wing Loong II) مسلح ڈرون تھا، جو خطے میں مشکوک سرگرمیوں میں مصروف تھا۔ ترجمان کے مطابق ڈرون کو ہدف بنانے کے لیے مناسب ایئر ڈیفنس ہتھیار کا استعمال کیا گیا، جبکہ یہ گزشتہ 24 گھنٹوں کے دوران حوثیوں کی جانب سے کسی بھی غیر ملکی ڈرون کو مار گرائے جانے کا مسلسل تیسرا واقعہ ہے۔

سعودی عرب کی جانب سے حوثی ترجمان کے اس دعوے پر فی الحال کوئی باضابطہ یا سرکاری ردِعمل سامنے نہیں آیا، جس کے باعث واقعہ کی آزادانہ تصدیق ممکن نہیں ہو سکی ہے۔ واضح رہے کہ حوثیوں نے جولائی میں اہم تجارتی آبی گزرگاہ باب المندب میں سعودی بحری آمدورفت کے خلاف ناکہ بندی کا اعلان کیا تھا، جس کی وجہ حوثیوں کے زیرِ کنٹرول یمنی علاقوں پر سعودی ناکہ بندی کو قرار دیا گیا تھا۔ بحیرۂ احمر اور باب المندب میں تجارتی و بحری سرگرمیاں اس وقت شدید سیکیورٹی خدشات اور بڑھتی ہوئی علاقائی کشیدگی کی زد میں ہیں۔