غزہ میں ماہرین پر مشتمل فلسطینی حکومت قائم کی جارہی ہے، جیرڈ کشنر

امریکی صدر کے نمائندہ خصوصیات اور وائٹ ہاؤس کے سینئر مشیر جیرڈ کشنر نے کہا ہے کہ غزہ پٹی میں بین الاقوامی نگرانی کے تحت تکنیکی ماہرین (ٹیکنوکریٹس) پر مشتمل ایک نئی فلسطینی حکومت قائم کرنے کی تیاری کی جا رہی ہے، جس میں نہ تو حماس کا کوئی نمائندہ شامل ہوگا اور نہ ہی فلسطینی اتھارٹی کے ارکان شامل ہوں گے۔ امریکی نمائندے کا کہنا تھا کہ غزہ کی باضابطہ تعمیرِ نو کا ایک جامع بین الاقوامی منصوبہ تیار ہے جس پر وقت درکار ہوگا، تاہم حماس کو غیر مسلح کرنے کے معاملے پر اہم پیش رفت جاری ہے۔

جیرڈ کشنر نے مزید واضح کیا کہ اس منصوبے کے حوالے سے اسرائیل کے ساتھ بنیادی امور پر اتفاق کر لیا گیا ہے، مگر جب تک خطے میں ہتھیاروں کی موجودگی ختم نہیں ہوتی تب تک نئی حکومت کا قیام اور مکمل انتظام منتقل کرنا ممکن نہیں ہوگا۔ انہوں نے تسلیم کیا کہ غزہ میں اسلحے کا مکمل خاتمہ ایک پیچیدہ عمل ہے مگر اس پر پیش رفت جاری ہے۔ انہوں نے یہ بھی دعویٰ کیا کہ امریکا غزہ میں بڑے پیمانے پر انسانی امداد پہنچا رہا ہے جس کے باعث علاقے میں شدید غذائی قلت کی صورتحال میں بہتری آئی ہے۔