امریکی معیشت مضبوط، روزگار میں اضافہ ہوا، اب شرح سود کم کی جائے: ٹرمپ

واشنگٹن: امریکی صدر ڈونلڈ ٹرمپ نے سوشل میڈیا پلیٹ فارم ’ٹروتھ سوشل‘ پر جاری اپنے ایک اہم بیان میں معیشت کی مضبوطی اور اگست کے روزگار اعدادوشمار کا حوالہ دیتے ہوئے فیڈرل ریزرو سے شرحِ سود میں فوری کمی کا مطالبہ کیا ہے۔

امریکی صدر نے کہا کہ اگست کے دوران امریکی معیشت میں 1 لاکھ 62 ہزار نئی ملازمتوں کا اضافہ ہوا ہے، جو تمام مالیاتی اندازوں اور توقعات سے کہیں بہتر ثابت ہوا ہے۔ انہوں نے کہا کہ معیشت کے مثبت اشاریے اس بات کا ثبوت ہیں کہ امریکی کریڈٹ کی صورتحال پہلے سے زیادہ مضبوط ہو چکی ہے، لہٰذا اعلیٰ شرحِ سود کے باعث معیشت کو پہنچنے والے نقصان کا فوری سدِ باب کرتے ہوئے فیڈرل ریزرو کو شرحِ سود میں کمی کرنی چاہیے۔

ڈونلڈ ٹرمپ نے سخت انتباہ جاری کرتے ہوئے کہا کہ اگر فیڈرل ریزرو نے شرحِ سود میں کمی نہ کی تو وہ ان تمام ممالک سے تجارت مکمل طور پر روک دیں گے جن کے ساتھ امریکا کا تجارتی خسارہ (Trade Deficit) موجود ہے۔ انہوں نے واضح کیا کہ امریکی سپریم کورٹ نے حالیہ فیصلے میں تجارتی خسارے والے ممالک کے خلاف اقدامات کرنے سے متعلق صدارتی اختیارات کو تسلیم کیا ہے، اور امریکا کو اعلیٰ شرحِ سود کے باعث عالمی سطح پر غیر منصفانہ نقصان نہیں اٹھانے دیا جائے گا۔