میں جنات کا بادشاہ ہوں، ایک جن 12 برس سے میرے ساتھ ہے: محسن گیلانی

ملتان: پاکستان ٹیلی ویژن اور ریڈیو کے معروف سینئر اداکار و پروڈیوسر سید محسن گیلانی نے حال ہی میں ایک پوڈکاسٹ کے دوران جنات اور روحانی تجربات کے حوالے سے اپنے غیر معمولی خیالات کا اظہار کیا ہے۔

ایک نجی پوڈکاسٹ میں گفتگو کرتے ہوئے ملتان سے تعلق رکھنے والے محسن گیلانی نے دعویٰ کیا کہ وہ جنات سے متعلق گہرا تجربہ رکھتے ہیں اور ان کے بقول گزشتہ 12 برسوں سے ایک جن ‘نجیب’ ان کے ساتھ موجود ہے۔ انہوں نے بتایا کہ ان کے آباؤ اجداد بھی اس حوالے سے علم رکھتے تھے اور یہ سلسلہ نسل در نسل منتقل ہوتا ہے۔ اداکار کا کہنا تھا کہ جنات کے بارے میں معاشرے میں مختلف غلط فہمیاں اور کہانیاں پبلک میں عام ہیں، حالانکہ وہ بھی مخلوق ہیں اور انسان ان سے افضلیت اور برتری رکھتا ہے۔

گفتگو کے دوران انہوں نے اداکار احسن خان کا حوالہ دیتے ہوئے ملتان کے تاریخی مزار حضرت بہاء الدین زکریا کے ایک واقعے کا ذکر بھی کیا۔ اس کے ساتھ ہی سید محسن گیلانی نے دینی و روحانی پہلوؤں پر روشنی ڈالتے ہوئے سورۃ الرحمٰن اور سورۃ الفاتحہ کو عظیم نعمتیں قرار دیا۔ انہوں نے بیماریوں اور ذہنی آسودگی کے لیے سورۃ الرحمٰن کو ترجمے کے ساتھ سننے اور پڑھنے کی تلقین کی، اور بتایا کہ متعدد افراد نے قرآنی آیات کی تلاوت سے شفا حاصل کی ہے۔