لارڈز ٹیسٹ میں شکست کے بعد بابر اعظم بخار میں مبتلا، قومی ٹیم پر دباؤ

لارڈز ٹیسٹ میں انگلینڈ کے ہاتھوں 194 رنز سے بدترین شکست اور پاکستان کرکٹ بورڈ (پی سی بی) کے اچانک فیصلوں کے بعد لندن میں مقیم قومی کرکٹ ٹیم کے ہوٹل میں شدید دباؤ اور سناٹے کی کیفیت ہے۔ ذرائع کے مطابق میچ میں ناکامی اور ہیڈ کوچ سمیت 7 کھلاڑیوں کو اچانک وطن واپس بھیجنے کے فیصلے سے کپتان بابر اعظم شدید ذہنی دباؤ اور بخار میں مبتلا ہو گئے ہیں۔ ٹیم کے میڈیا منیجر نوید اکرم چیمہ نے بابر اعظم کی طبیعت ناساز ہونے کی تصدیق کرتے ہوئے بتایا کہ کپتان نے انہیں خود بخار میں مبتلا ہونے کا بتایا ہے، تاہم تشویش کی کوئی بات نہیں ہے اور وہ جلد مکمل صحت یاب ہو جائیں گے۔