ٹرمپ انتظایہ کی روس اور یوکرین جنگ کے خاتمے کیلئے کوششیں تیز

واشنگٹن اور میامی میں ہونے والی حالیہ پیش رفت کے مطابق، امریکی صدر ڈونلڈ ٹرمپ کی انتظامیہ روس کو یوکرین کے خلاف جاری جنگ کے خاتمے اور امن مذاکرات کی میز پر واپس لانے کے لیے سرگرم ہو گئی ہے۔ اس سلسلے میں روسی ڈیزل کی عالمی برآمدات سے متعلق معاہدے کو ماسکو کا کٹر مؤقف نرم کرنے کے لیے بطور سفارتی حربہ استعمال کرنے کی اہم تجویز سامنے آئی ہے۔

خبر رساں ادارے رائٹرز کی رپورٹ کے مطابق، امریکی مشرقِ وسطیٰ ایلچی اسٹیو وٹکوف (Steve Witkoff) اور صدر ٹرمپ کے داماد جیرڈ کشنر (Jared Kushner) نے میامی میں یوکرینی وفد و اعلیٰ حکام سے اہم ملاقات کی۔ ملاقات کے دوران امریکی حکام نے بتایا کہ روسی ڈیزل کی امریکہ اور بین الاقوامی منڈیوں کو روزانہ 22 لاکھ 50 ہزار (2.25 million) بیرل سے زائد فراہمی کا معاہدہ سہ فریقی مذاکراتی عمل کو دوبارہ بحال کرنے میں کلیدی کردار ادا کر سکتا ہے۔

امریکی حکام نے اس دوران یوکرینی وفد پر زور دیا کہ وہ روسی آئل ریفائنریوں اور توانائی کی تنصیبات پر ڈرون و میزائل حملے فوری طور پر روکے۔ تاہم یوکرینی وفد نے اس امریکی تجویز سے باضابطہ اتفاق کرنے سے فی الحال انکار کر دیا اور واضح کیا کہ یوکرین اسی صورت میں روسی توانائی کے ڈھانچے پر حملے روکے گا جب روس کی جانب سے بھی جامع جنگ بندی پر واضح آمادگی دکھائی جائے۔ دوسری جانب کریملن سے وابستہ ذرائع کے مطابق روسی صدر ولادیمیر پیوٹن ڈونباس کے باقی ماندہ 11 فیصد علاقے کا مکمل کنٹرول حاصل کیے بغیر کسی امن معاہدے پر راضی ہونے کے لیے تیار نہیں، جبکہ یوکرین نے اپنا مزید کوئی بھی علاقہ روس کے حوالے کرنے سے صاف انکار کر دیا ہے۔