جرمنی میں پولینڈ کے سٹارلنک سیٹلائٹ سٹیشن کو آگ لگانے کے شبہہ میں دو ترک شہری گرفتار

جرمنی میں پولینڈ کے ‘سٹارلنک’ سیٹلائٹ کمیونیکیشن گراؤنڈ اسٹیشن کو آگ لگانے کے الزام میں دو ترک شہریوں کو حراست میں لے لیا گیا ہے۔

خبر رساں ادارے اے ایف پی (AFP) کے مطابق، پولینڈ کے وزیراعظم ڈونلڈ ٹسک (Donald Tusk) نے جرمنی میں ہونے والی ان گرفتاریوں کی باقاعدہ تصدیق کرتے ہوئے اس تخریبی واقعے کو یورپی انفراسٹرکچر کے خلاف ’ہائبرڈ وارفیئر‘ (Hybrid Warfare) یعنی غیر روایتی اور خفیہ تخریبی کارروائی کا حصہ قرار دیا ہے۔

پولینڈ کے وزیرِ داخلہ مارسن کیئرونسکی (Marcin Kierwiński) نے بتایا کہ گرفتار کیے گئے دونوں ترک شہریوں پر غیر ملکی انٹیلی جنس ایجنسی کی ایماء پر جاسوسی اور تخریب کاری کے سنگین الزامات عائد کیے گئے ہیں۔ پولینڈ اور جرمنی کی سیکیورٹی ایجنسیوں کے مشترکہ آپریشن کے ذریعے ان ملزمان کو یوروپول اور جرمن حکام کی مدد سے گرفتار کیا گیا۔

واضح رہے کہ ستمبر کے آخر میں آگ کا نشانہ بننے والا یہ اسٹیشن وسطی پولینڈ کے علاقے مازوویا (Masovian Voivodeship) میں واقع ہے، جو سرکاری ٹیلی کام کمپنی ‘ایکساٹیل’ (Exatel) کی ملکیت ہے۔ یہ مرکز پولینڈ اور یوکرین کے درمیان انٹرنیٹ اور مواصلاتی ٹریفک کی ترسیل کے لیے کلیدی اہمیت رکھتا ہے۔ واقعے کے وقت آگ لگنے کے باوجود اسٹیشن فعال رہا تھا، تاہم پولینڈ نے اسے یوکرینی افواج اور اداروں کی انٹرنیٹ رسائی منقطع کرنے کی گہری سازش قرار دیا ہے۔