ایرانی صدر کی سپریم لیڈر سے 7 گھنٹے طویل ملاقات، حکومتی مسائل بارے تبادلہ خیال

ایرانی صدر مسعود پزشکیان نے انکشاف کیا ہے کہ انہوں نے ایران کے سپریم لیڈر آیت اللہ مجتبیٰ خامنہ ای کے ساتھ 7 گھنٹے طویل تفصیلی ملاقات کی ہے، جس میں ملک کے انتظامی امور، حکومتی مسائل اور اصلاحات پر سیر حاصل گفتگو کی گئی۔

ایران کی مختلف جامعات کی افتتاحی تقریب اور نئے تعلیمی سال کے آغاز کے موقع پر خطبہ دیتے ہوئے صدر مسعود پزشکیان نے بتایا کہ بحیثیت صدر منتخب ہونے کے بعد سے اب تک 7 ماہ کے دوران ان کی سپریم لیڈر سے دو مرتبہ اہم ملاقاتیں ہو چکی ہیں۔ انہوں نے کہا کہ ملک کو درپیش مسائل کی بڑی وجہ وسائل یا امکانات کی کمی نہیں، بلکہ اہل اور باصلاحیت افراد کے انتخاب کا نہ ہونا، ناقص مینجمنٹ اور درست فیصلوں پر بروقت عمل درآمد کے فقدان جیسے عوامل ہیں۔

ایرانی صدر نے بعض سرکاری اداروں اور حکومتی کمپنیوں کی کارکردگی پر شدید تنقید کرتے ہوئے کہا کہ وہاں کا موجودہ طرزِ انتظام شدید نقائص کا شکار ہے اور ایران کے نظامِ حکمرانی اور عوامی انتظامیہ میں فوری و بنیادی اصلاحات ناگزیر ہو چکی ہیں۔ اعلیٰ عہدوں پر تقرریوں کا ذکر کرتے ہوئے مسعود پزشکیان کا کہنا تھا کہ جب حکومت کسی قابل اور موزوں فرد کو انتظامی عہدے پر تعینات کرنا چاہتی ہے تو اکثر عدلیہ یا دیگر سرکاری اداروں کی جانب سے اعتراضات سامنے آتے ہیں، جس کے نتیجے میں تقرری کا عمل بری طرح متاثر ہوتا ہے۔