ٹرمپ نے ایران پر ایٹمی حملے کا سوال احمقانہ قرار دے کر مسترد کردیا

واشنگٹن: امریکی صدر ڈونلڈ ٹرمپ نے ایران کے خلاف ایٹمی ہتھیار استعمال کرنے کے امکان سے متعلق صحافی کے سوال کو “احمقانہ” قرار دیتے ہوئے کہا ہے کہ ایرانی فوج پہلے ہی مکمل طور پر شکست خوردہ ہے، اس لیے اس پر ایٹمی حملے کی کوئی ضرورت یا جواز نہیں۔

وائٹ ہاؤس میں میڈیا نمائندوں سے گفتگو کرتے ہوئے جب امریکی صدر سے سوال کیا گیا کہ کیا انہوں نے ایران کے خلاف ایٹمی آپشن کو مکمل طور پر خارج کر دیا ہے، تو ڈونلڈ ٹرمپ نے صحافی پر سخت برہمی کا اظہار کرتے ہوئے کہا کہ “میں کبھی ایسا نہیں کہوں گا، لیکن جواب ہاں میں ہے کیونکہ اس کا کوئی مقصد نہیں بنتا۔” انہوں نے موقف اختیار کیا کہ جب ایران کو عسکری طور پر پہلے ہی شدید نقصان پہنچایا جا چکا ہے تو پھر اس پر ایٹمی ہتھیار استعمال کرنے کی کیا تک بنتی ہے؟

امریکی صدر نے ایران کو معاشی اور عسکری لحاظ سے ایک “ناکام ریاست” قرار دیتے ہوئے دعویٰ کیا کہ تہران کی فوج اور معیشت دونوں تباہ ہو چکی ہیں۔ تاہم ٹرمپ نے واضح کیا کہ امریکہ ضرورت پڑنے پر مزید روایتی عسکری کارروائیاں کر سکتا ہے۔ انہوں نے اپنے اس عزم کا اعادہ بھی کیا کہ واشنگٹن کسی بھی صورت ایران کو جوہری ہتھیار حاصل کرنے کی اجازت نہیں دے گا۔ ٹرمپ کے اس سخت بیان کے باوجود دونوں ممالک کے مابین کشیدگی بدستور برقرار ہے۔