مصباح الحق سلیکشن کمیٹی سے مستعفی، پی سی بی کے فیصلے پر ناراضی

لاہور: پاکستان کرکٹ ٹیم کے سابق کپتان اور نامور بلے باز مصباح الحق نے پاکستان کرکٹ بورڈ (PCB) کی سلیکشن کمیٹی کی رکنیت سے باضابطہ استعفیٰ دے دیا ہے۔

ذرائع کے مطابق مصباح الحق پی سی بی کے رویے اور فیصلے سازی میں سلیکشن کمیٹی کو نظر انداز کرنے پر شدید نالاں تھے۔ استعفے کی بنیادی وجہ پاکستان اور انگلینڈ کے درمیان جاری ٹیسٹ سیریز کے لیے سلیکشن کمیٹی کی مشاورت کے بغیر ٹیم میں نئے کھلاڑیوں کی شمولیت بنی۔

ذرائع کا بتانا ہے کہ کرکٹ بورڈ انتظامیہ نے چھ کھلاڑیوں کو سلیکشن کمیٹی سے کسی قسم کی مشاورت کے بغیر ہی انگلینڈ بھیجنے کا فیصلہ کیا، جس پر مصباح الحق نے شدید تحفظات کا اظہار کیا۔ کھلاڑیوں کے انتخاب جیسے اہم معاملے پر نظر انداز کیے جانے اور بورڈ کے غیر پیشہ ورانہ رویے پر دلبرداشتہ ہو کر سابق کپتان نے بطور رکن سلیکشن کمیٹی اپنے عہدے سے الگ ہونے کا اعلان کر دیا۔