سہیل سمیر نے وائرل غیر اخلاقی ویڈیو پر مداحوں سے معذرت کرلی

کراچی/لاہور: نامور پاکستانی اداکار سہیل سمیر نے سوشل میڈیا پر وائرل ہونے والے ایک پرانے اور غیر اخلاقی ویڈیو کلپ پر اپنے مداحوں اور سوشل میڈیا صارفین سے دلی معذرت کر لی ہے۔

چند روز قبل سوشل میڈیا کے مختلف پلیٹ فارمز پر سہیل سمیر کی ایک خاتون اداکارہ کے ساتھ مختصر ویڈیو گردش کرنے لگی تھی، جس پر صارفین کی جانب سے شدید ردعمل اور تنقید کا اظہار کیا گیا۔ اس تنازع کے بعد اداکار نے اپنے سوشل میڈیا اکاؤنٹ کے ذریعے ایک ویڈیو پیغام جاری کرتے ہوئے واضح کیا کہ یہ کلپ ایک پرانی فلم کا حصہ تھا جو تقریباً 10 سال قبل شوٹ کی گئی تھی۔

سہیل سمیر نے اپنے جذباتی پیغام میں کہا کہ وہ ان تمام افراد سے دل کی گہرائیوں سے معذرت خواہ ہیں جنہیں اس وائرل کلپ سے دکھ یا مایوسی پہنچی۔ انہوں نے اپنی غلطی تسلیم کرتے ہوئے کہا کہ اس وقت شاید انہیں اندازہ نہیں تھا کہ ماضی کی کوئی غلطی اس طرح دوبارہ سامنے آئے گی، تاہم آج انہیں احساس ہوا ہے کہ عزت کمانے میں دہائیاں لگ جاتی ہیں لیکن اسے گنوانے میں ایک لمحہ لگتا ہے۔ انہوں نے تسلیم کیا کہ انہیں اس قسم کے کام سے اجتناب کرنا چاہیے تھا اور درخواست کی کہ تمام لوگ ان کی غلطی کو درگزر کرتے ہوئے انہیں معاف کر دیں۔