امریکی فوج کے سیکرٹری ڈین ڈرسکول مستعفی

امریکی فوج کے سیکرٹری ڈین ڈرسکول اپنے عہدے سے مستعفی ہو گئے ہیں۔ امریکی میڈیا کے مطابق ان کے اچانک استعفے کی واضح وجوہات نہیں بتائی گئیں، جبکہ امریکی فوج اور ڈرسکول کے ترجمان نے اس معاملے پر فوری طور پر کوئی تبصرہ کرنے سے گریز کیا ہے۔ تاہم ذرائع کا کہنا ہے کہ ڈرسکول کے امریکی وزیرِ جنگ پیٹ ہیگستھ کے ساتھ کافی عرصے سے شدید اختلافات چلے آ رہے تھے۔ واضح رہے کہ اس سے قبل اپریل میں امریکی وزیرِ جنگ نے جنرل رینڈی کو بھی اچانک ان کے عہدے سے ہٹا دیا تھا، جس کے بعد فوج میں اہم تبدیلیوں اور اندرونی کشیدگی سے متعلق قیاس آرائیوں میں اضافہ ہو گیا ہے۔