واٹس ایپ کا اے آئی کانٹنٹ لیبل فیچر آزمائش کے لیے پیش

کیلیفورنیا: دنیا کی مقبول ترین انسٹیٹیوٹ میسجنگ ایپلی کیشن ’واٹس ایپ‘ نے اپنے چینلز پلیٹ فارم کے لیے ایک نیا انقلابی فیچر متعارف کرانا شروع کر دیا ہے، جس کے ذریعے چینل ایڈمنز اپنی پوسٹس میں مصنوعی ذہانت (AI) کی مدد سے تیار کردہ میڈیا کو واضح طور پر لیبل کر سکیں گے۔

اس فیچر کے تحت ایڈمنز کو چینل پر تصاویر یا ویڈیوز اپ لوڈ کرتے وقت ’ایڈ اے آئی کانٹنٹ لیبل‘ (Add AI content label) کا انتخاب کرنے کا آپشن فراہم کیا جائے گا۔ ایک بار جب ایڈمن اس لیبل کو منتخب کر لے گا تو وہ پوسٹ کے میڈیا ببل (Media Bubble) پر نمایاں طور پر ظاہر ہوگا، جسے بعد میں ہٹایا نہیں جا سکے گا۔ اس فیچر کی بدولت چینل کے تمام فالوورز یہ آسانی سے جان سکیں گے کہ ان کے سامنے موجود مواد اصلی ہے یا مصنوعی ذہانت کے ذریعے تخلیق کیا گیا ہے۔

ابتدائی طور پر یہ فیچر اینڈرائیڈ کے بیٹا ورژنز پر دیکھا گیا تھا، تاہم اب کمپنی نے اسے iOS پلیٹ فارم تک توسیع دے دی ہے۔ یہ سہولت واٹس ایپ بیٹا فار iOS کے 26.34.10.70 اپ ڈیٹ میں ٹیسٹ فلائٹ (TestFlight) پر ٹیسٹنگ کے لیے دستیاب ہے۔ واٹس ایپ کا کہنا ہے کہ متعدد ممالک میں چینل ایڈمنز کے لیے اے آئی کانٹنٹ کی نشاندہی کرنا قانونی ضرورت بن چکا ہے، جس کا بنیادی مقصد جعلی اور گمراہ کن معلومات کا تدارک اور صارفین کو شفاف معلومات کی فراہمی ہے۔