مکہ دفاعی معاہدے کے تحت سہ ملکی کمیٹی کا پہلا اجلاس آج استنبول میں ہوگا

پاکستان، ترکیہ اور سعودی عرب کے کے مابین طے پانے والے تاریخی مکہ مشترکہ دفاعی معاہدے کے تحت سہ ملکی کمیٹی کا پہلا اہم اجلاس آج استنبول میں منعقد ہو رہا ہے۔ اجلاس میں نائب وزیراعظم اسحاق ڈار، وزیر دفاع خواجہ آصف اور فیلڈ مارشل سید عاصم منیر پاکستان کی نمائندگی کریں گے جبکہ ترکیہ اور سعودی عرب کے وزرائے خارجہ، وزرائے دفاع اور چیفس آف جنرل اسٹاف بھی شرکت کر رہے ہیں۔ اجلاس کا بنیادی مقصد تینوں اسلامی ممالک کے درمیان دفاعی و سیکیورٹی تعاون، عالمی سلامتی، اور دفاعی صنعت میں ٹیکنالوجی کی مشترکہ پیداوار کو مضبوط بنانا ہے۔ اس سلسلے میں نائب وزیراعظم اسحاق ڈار نے استنبول پہنچ کر ترکیہ کے وزیر خارجہ حاقان فیدان سے ملاقات کی اور حضرت ابو ایوب انصاریؓ کے مزار پر حاضری بھی دی۔ وزیراعظم شہباز شریف نے اپنے بیان میں اس پیش رفت کو سراہتے ہوئے کہا ہے کہ مکہ معاہدہ تینوں برادر ممالک کو ایک مضبوط دفاعی اور اسٹریٹجک رشتے میں جوڑتا ہے جو خطے میں مشترکہ سیکیورٹی کی ضامن ہے۔