لاہور میں پنکی طرز کے منشیات فروشی کے نیٹ ورک کا انکشاف

لاہور کے پوش علاقوں میں ‘پنکی’ طرز کے ایک بڑے منشیات فروشی کے نیٹ ورک کا انکشاف ہوا ہے۔ پولیس ذرائع کے مطابق گرفتار ملزمان کے انکشافات پر آئس اور ویڈ کے مرکزی سپلائر احمد عرف پیر لالہ خان کا نام سامنے آیا ہے، جو اسلام آباد کے علاقے ای الیون کا رہائشی ہے اور وہاں سے لاہور کے علاقوں ڈیفنس، گلبرگ، ماڈل ٹاؤن، گارڈن ٹاؤن اور کیولری گراؤنڈ میں ہائی سوسائٹی کو منشیات سپلائی کرتا ہے۔ سی سی ڈی پولیس ذرائع کا کہنا ہے کہ جس طرح ‘پنکی’ لاہور میں بیٹھ کر کراچی منشیات بھیجتی تھی، اسی طرح پیر لالہ خان اسلام آباد سے لاہور کا نیٹ ورک چلا رہا ہے۔ تاہم، لاہور اور اسلام آباد پولیس کے درمیان روابط کے فقدان کے باعث طویل عرصے سے اس دھندے میں ملوث مرکزی ملزم کی گرفتاری تاحال عمل میں نہیں لائی جا سکی ہے۔