آبنائے ہرمز سے کسی جہاز کو بغیر اجازت گزرنے کی اجازت نہیں: ایران

تہران: ایرانی پارلیمنٹ کی قومی سلامتی و خارجہ پالیسی کمیٹی کے سربراہ ابراہیم عزیزی نے اعلان کیا ہے کہ ایرانی مسلح افواج اور پاسدارانِ انقلاب کی بحریہ کی باضابطہ اجازت کے بغیر کوئی بھی تجارتی یا عسکری بحری جہاز آبنائے ہرمز سے نہیں گزر سکتا۔

ابراہیم عزیزی نے اپنے ایک بیان میں واضح کیا کہ اس اہم عالمی آبی گزرگاہ کو استعمال کرنے والے تمام بحری جہازوں کو ایرانی حکام سے پیشگی این او سی (NOC) اور پاسدارانِ انقلاب (IRGC) کی بحریہ سے رابطہ قائم کر کے مقررہ سیکورٹی ضوابط کی مکمل پاسداری کرنا ہو گی۔ ایرانی حکام کے مطابق اس اقدامات کا مقصد خطے کی سیکیورٹی کے تحت سمندری آمدورفت کو مزید منظم اور باضابطہ بنانا ہے۔

واضح رہے کہ تہران انتظامیہ گزشتہ کچھ عرصے سے آبنائے ہرمز میں اپنے انتظامی و سیکورٹی کنٹرول کو قانونی شکل دینے کے لیے قانون سازی پر کام کر رہی ہے۔ رواں برس مئی میں بھی ایرانی حکام نے دعویٰ کیا تھا کہ متعدد یورپی ممالک اپنے تجارتی جہازوں کی محفوظ اور بلا تعطل گزرگاہ کے لیے تہران کے ساتھ رابطہ کر رہے ہیں، جبکہ ایرانی پارلیمنٹ میں آبی گزرگاہ کے انتظام کا نیا نظام نافذ کرنے کے لیے کوششیں جاری ہیں۔