سانحہ پمز: ن لیگ کی سینیٹر سعدیہ عباسی کی اپنی حکومت پر شدید تنقید، ای ڈی پمز کی فوری گرفتاری کا مطالبہ

اسلام آباد: مسلم لیگ (ن) کی سینئر رہنما اور سینیٹر سعدیہ عباسی نے پمز (PIMS) ہسپتال میں پیش آنے والے المناک سانحے پر اپنی ہی حکومت اور انتظامیہ کو شدید تنقید کا نشانہ بناتے ہوئے ایگزیکٹو ڈائریکٹر (ED) پمز کی فوری برطرفی اور گرفتاری کا مطالبہ کر دیا ہے۔

سینیٹ اجلاس میں اظہارِ خیال کرتے ہوئے سینیٹر سعدیہ عباسی نے افسوس کا اظہار کیا کہ اس بڑے سانحے کے بعد کسی بھی اعلیٰ عہدیدار نے لاپرواہی کی ذمہ داری قبول نہیں کی۔ انہوں نے کہا کہ وزیراعظم کو اس سانحے کی اخلاقی اور انتظامی ذمہ داری قبول کرنی چاہیے، کیونکہ سنگین غفلت کے باوجود اب تک کوئی مؤثر قدم نہیں اٹھایا گیا۔

سعدیہ عباسی نے ای ڈی پمز کے بااثر ہونے پر سوالات اٹھاتے ہوئے انکشاف کیا کہ ای ڈی اتنے طاقتور ہیں کہ وزیراعظم بھی انہیں معطل کرنے سے قاصر ہیں۔ انہوں نے انکشاف کیا: “میں اور سینیٹر سلیم مانڈوی والا ای ڈی پمز کی تقرری کے سلیکشن بورڈ میں شامل تھے اور ہم دونوں نے اس تعیناتی کی سخت مخالفت کی تھی، لیکن بیوروکریسی نے اس افسر کی بے پناہ حمایت کی اور انہیں عہدے پر لگوایا۔”

انہوں نے مزید کہا کہ ای ڈی پمز کی رسائی ایسی جگہوں پر ہے جہاں کوئی ہاتھ نہیں لگا سکتا۔ انہوں نے ای ڈی کو اس سانحے کا اصل قصوروار اور “قاتل” قرار دیتے ہوئے کہا کہ انہیں عہدے سے ہٹانے کے بجائے بچایا جا رہا ہے، جبکہ حقیقت یہ ہے کہ انہیں فوری طور پر گرفتار کیا جانا چاہیے تھا۔